جنتي عالمي

طيـــــــــاره طيـــــــــــاره ..

أنا فكراني لما كنت صغيرة ، أول ما اسمع صوت الطيارة أجري بسرعة اوى على الشباك ، مش بس علشان أشوف الطيارة وهي ثابته فى الهواء بين السحاب وسط السماء ، لأ دا أنا كنت بجري عليها كمان عشان أشاور لها ، كان بيتهيألي وقتها أنها شيفاني وسمعاني ، بالظبط زي ما أنا شيفاها وسمعاها ، شيفاها صغيرة اوي وسمعها بصوتها الكبير اوي اوي اوي والمزعج أحياناً، كنت بستناها تنزل وتخدني ونطير مع بعض فى الهواء .. 

ياااه قد ايه شكلها جميل زى طير ابيض رقيق ،، 

بس لأ الطيارة وحشة الطيارة مش حلوة خالص خالص أصلاً انا مش بحبها ، علشان هي مبتسمعنيش ولا عايزة تنزل تاخدني ونطير ولو حتي شوية صغيرين اد كده ،، كل مرة أجري و أنادي عليها وأشاور لها وهي بتطير بعيد وتسبني لوحدي ،،طيب ي رب الطيارة تنزل وتاخدني ونطير بقي ي رب .. 

لحد هنا وده كان الشوت الاول من حكايتي وانا صغيرة مع الطيارة .. 

بقى انا لما كبرت وشفت الطيارة فى حجمها الطبيعي وقربت منها أكتر ،، الموضوع أختلف تماماً ،، عايزة أقولكم أني فعلاً بشكر ربنا انه مستجبش لدعوتي وان أمنيتي المجنونه متحققتش ،، كمان بشكر الطيارة الطيوبة انها مسمعتش كلامي ..

بقى معقوله الطيارة اللى كنت بشوفها صغنونة فى السماء تكون كــــــــــل ده ،، مستوعبتش الحكاية بسرعة خصوصاً لما قارنت حجم الطيارة بحجم الشباك اياه اللى كنت بشوار لها منه ،، والاستغراب الاكبر من كل ده لما عرفت ان صوت الطيارة الكبير اوى المزعج اوى هو صوت المحركات اللى " لا قدر الله " لو وقفت ولو للحظة معناه خطر كبير حاصل.. )

علمتني الحدودته دي كلها شوية حاجات : 

- انه الاقدر بأمر الله ، اى بأمر الرحمان الرحيم . 

- استجابة الدعاء هي أيضاً بيد الله ولا تنقص أبـــــــــداً من ملكه شئ لكنه أعلم منّا بالخير من الشر ، فلِما العجلة " فى حال تأخر الاجابة " ولِما السخط " فى حال عدم الاجابة " 

- تعلمت أن الازعاج أو عدم الهدوء ، مفيد بعض الاحيان .. 

- تعلمت انه الحكم على الاشياء من قرب هو ذروة دقتها حيث يضفي شئ من الانصاف عن الحكم عليها من بعد بالطبع ..

- تعلمت أن أكون طامحة وآمله الى كل ما هو جدير ومناسب بذلك ..

- تعلمت انه احياناً تتوقف أمانينا على حياتنا ونحن لا ندري " ربما قلة تعلم او قلة خبرات او عدم دقة ف التخطيط " وعلى اى حال ينبغى التفكير ثم التفكير ثم التفكير ..

- تعلمت انه ربما يكون لحظة تحقيق حلمك فى الحياة هي لحظة انتهاء حياتك نتيجة حلم ، فأنتقى حلمك ، وتمهلّ .. 

إينَاسـ